Құлсары қаласында «Теңізшевройл» ЖШС-ның (ТШО) Жылыой ауданын дамыту бағдарламасы аясында Орталық Азияның Еуразиялық қоры (ОАЕҚ) жүзеге асырып жатқан «Таңдау» пилоттық жобасының қорытындысы шықты. Жоба аудан тұрғындарына пайызсыз несие беру арқылы өз ісін ашуға және дамытуға бірегей мүмкіндіктер берді.  

2023-2024 жылдардың қорытындысы бойынша 105 адам оқытылды. Оның ішінде 44 қатысушы өз кәсіпкерлік жобаларына қаржылай көмек алды. Бір жыл ішінде шағын кәсіпкерлікке жалпы сомасы 155 миллион теңгеге пайызсыз несие берілді.

«Таңдау» жобасы қайтарылған қаражатты жаңа бизнес бастамаларға қайта инвестициялауды, шағын және орта бизнесті ұзақ мерзімді қолдау мен дамытуды көздейтінімен ерекше. Ол Жылыой ауданында кәсіпкерлікті қолдау мен дамытудың маңызды құралына айналып, жергілікті тұрғындардың өмір сүру сапасын жақсартуға және қоғамдастықтың дамуына оң ықпал етуге бағытталған.

Жылыой ауданы әкімінің орынбасары Гүлнафис Айшуақова «Таңдау» жобасының тұрғындар арасында сұранысқа ие екендігін және өзінің тиімділігін дәлелдегенін баса айтты.

- «Таңдау» Жылыой ауданының тұрғындары үшін үлкен мүмкіндіктер береді, өйткені жобаның негізгі нәтижелерінің бірі халықтың осал топтарын, соның ішінде көп балалы отбасыларды және жастарды қолдау және тарту болды. Қатысушыларға бизнесте табыс тілейміз және жобаны жалғастыра береміз деген үміттеміз», - деді Гүлнафис Айшуақова.

Сонымен қатар, бұл күні бағдарламаның үшінші кезеңінің жеңімпаздарын марапаттау рәсімі өтті. Олар - 18 адам, оның ішінде 13 көп балалы отбасы, 8 әйел, 8 жастар өкілі және Теңіз кен орнының мердігерлік ұйымдарынан босап келген 5 адам. Жобаның осы кезеңінде білім беру, автосервис, ет өнімдері, азық-түлік, ауыл шаруашылығы өнімдері, тігін өндірісі, ақпараттық технологиялар сияқты бизнес бағыттарын қолдау үшін несиелер бөлінді. Келіп түскен өтінімдерді ТШО, ОАЕҚ қызметкерлері және бизнес саласында үлкен тәжірибесі бар жергілікті тәуелсіз кәсіпкерлер бағалады.

Байқау жеңімпаздарының бірі Жоламан Исабек айтқандай, ол жобаға күмәнданған, бірақ кейін нақты нәтижелер мен алдыңғы қатысушылардың жетістіктерін көрген.

- Тренинг маған өз бетімше бизнес-жоспар құруға және құнды заманауи білім алуға көмектесті. Менің автокөліктерге арналған қосалқы бөлшектер мен керек-жарақтар сататын дүкенім бар, клиенттер маған жақын маңда шина жөндеу орталығын ашуды жиі сұрайтын. Оны заманауи құрал-жабдықтармен жарақтандырып, сондай-ақ көрсетілетін қызметтің сапасын арттыру мақсатында «Таңдау» жобасының грантына құжаттар тапсырып, жеңіп алдым. Ендігі жоспарым жергілікті тұрғындарды жұмыспен қамту», – дейді Жоламан Исабек.

«Теңізшевройл» компаниясы тарапынан «Таңдау» жобасының үйлестірушісі Асқар Ибрагимовтың айтуынша, бағдарлама кәсіпкерлерге өз біліктіліктерін арттырып, табысты бизнес жүргізуге қажетті дағдыларды меңгеруге мүмкіндік берді. Жылыой ауданының тұрғындары ауыл шаруашылығы, өңдеу өнеркәсібі, бөлшек сауда, қызмет көрсету сияқты түрлі салаларда жаңа кәсіпорындар ашуға мүмкіндік алды. Бұл аймақтағы экономикалық өсуді ынталандырып қана қоймай, жаңа жұмыс орындарын ашты.

«Бағдарлама жастардың, әйелдердің және Теңіздегі демобилизацияланған жұмысшылардың кәсіпкерлік бастамасын дамытуға септігін тигізгенін ерекше атап өткен жөн. Осылайша, «Таңдау» пилоттық бағдарламасы Жылыой ауданында неғұрлым инклюзивті және тұрақты экономика құрудың маңызды құралына айналды. Жалпы алғанда, микроқаржыландыру пилоттық жобасы өзінің тиімділігі мен маңыздылығын көрсетті және оның табыстылығы бағдарламаны кеңейту және оны ұзақ уақыт бойы жүзеге асыру үшін тамаша негіз болып табылады», - деді жабылу рәсімінде жобаның үйлестірушісі Асқар Ибрагимов.

Айта кетейік, «Таңдау» жобасы Атырау облысында 2023 жылдың қыркүйегінен бастап жүзеге асырылып келеді. Қатысушылар стратегиялық және қаржылық жоспарлау, маркетинг және бизнесті дамыту бойынша білім алады, сондай-ақ 5 жылға пайызсыз несиеге қажетті құрал-жабдықтарды сатып алу мүмкіндігіне ие болады.