Жергілікті жеткізушілермен жұмыс және қазақстандық өндірістегі тауарлар, жұмыстар мен қызметтерді (ТЖҚ) сатып алу мәселелері Атырау қаласында өткен жыл сайынғы «Қазнефтегазсервис – 2025: Мұнай-газ құрылысы және инжиниринг» конференциясында талқыланды. Конференцияға 150 қазақстандық компания өкілдері, сондай-ақ Катар, БАӘ және Ресейден келген шетелдік компаниялар қатарынан 300-ге жуық адам қатысты.
ТШО бас директорының орынбасары Конилкош Суесинов бизнес-серіктестермен ашық диалог орнатудың маңыздылығын атап өтіп, ТШО-ның Қазақстан экономикасын дамытуға қосқан үлесін ерекше белгіледі. Ол өз сөзінде ТШО-ның жергілікті нарықты дамытуға салған ауқымды инвестициялары туралы айтты. 2024 жылы Қазақстанға төлемдер 11 миллиард АҚШ долларынан асты, ал қазақстандық өндіріс ТЖҚ сатып алу шығындары 3 миллиард доллардан асты.
«ТШО-ның негізгі бағыттарының бірі – қазақстандық өндірушілерді қолдау. 2024 жылы компания Энергетика министрлігімен бірлесіп, қазақстандық қамтуды дамыту стратегиясын әзірледі. Бұл стратегия жергілікті өндірушілерді қолдау тетіктерін жетілдіруді, тендерлік рәсімдерде баға төзімділігін (KC Tolerance) қамтамасыз етуді және үш немесе одан да көп жергілікті өндірушілер болған жағдайда тендерді тек отандық компаниялар арасында өткізуді көздейді», – деді Конилкош Суесинов.
Форум барысында ТШО-ның стратегиялық сатып алу жөніндегі менеджері Рафаэль Аланья 2025 жылға арналған жылдық сатып алу және келісімшарт жоспарын таныстырды. Бұл жоспар компанияның алдағы жылға арналған ТЖҚ қажеттіліктерін көрсетеді. Ол ТШО-ның тендерлік процесі, қазақстандық өндірушілерді қолдау шаралары, сондай-ақ офф-тейк келісімдері, ерте тендерлер мен инвестициялар үшін ұзақ мерзімді келісімшарттарды қамтитын жаңа тетіктер туралы толығырақ айтып өтті.
«Біздің саясатымыздағы негізгі өзгерістердің бірі – белгілі бір тауарлық санаттар үшін \"тек жергілікті тендерлер\" қағидасын енгізу, бұл қазақстандық қамту үлесін арттыруға көмектеседі. Сонымен қатар, біз жергілікті өндірушілердің өнімдерінің техникалық талаптарға сәйкестігін бағалау үшін сынақ тапсырыстары жүйесін қолданамыз. Бұдан бөлек, компания ұзақ мерзімді келісімшарттарда негізгі тиімділік көрсеткіштерін (KPI) енгізіп, мердігерлерді жергілікті қамтуды арттыруға ынталандырады», – деп атап өтті Рафаэль Аланья.
Сонымен қатар, ол жергілікті жеткізушілер үшін қаржылық біліктілікті жеңілдету және локализация міндеттемесі бар келісімшарт тетіктерін енгізу туралы айтты. Бұл қазақстандық өндірушілер үшін жаңа мүмкіндіктер ашады және ТШО жеткізілім нарығына кіру кедергілерін төмендетеді.
Теңізшевройл тұрақты даму қағидаттарына бейілді болып қала береді және Қазақстан экономикасына елеулі үлес қосуға ұмтылады. 2024 жылы ТЖҚ-дағы қазақстандық қамту үлесі шамамен 70%-ды құрады.
